معلش انا هطول عليكوا شوية بس علشان نتكلم فى حكاية الزمالك دى من اولها ونمسكها واحدة واحدة بس ياريت محدش يزعل علشان دى الحقيقة وانا ان شاء الله هقول الكلام المنطقى واللى يخش دماغ كل أهلاوى وزملكاوى
أولا: كدة ومن غير ماندخل فى تفاصيل انا هتكلم على أنواع الزملكاوية, ونادى الزمالك دة عبارة عن اية اساسا, وحبة حاجات صغيرة كدة
نبتدى
بسم الله
كلمة زمالك هيه جمع زملك, والزملك هوه عبارة عن مقلب زبالة صغير بس بالتركى ( انا مش بهزر ) بس مفيش كلمة بالتركى اسمها زمالك زى مابيتقال بس هيه اسمها زملك, والجمع بتاعها زمالك. جمهور الزمالك فى مصر بيمثل حوالى 15% علشان 80% من الشعب المصرى أهلاوى و15% زملكاوى وال5% الباقيين متوزعيين على باقى الاندية ومنهم الاسماعيلى والاتحاد وكل الاندية اللى مش لقية تاكل دى. ال15% من الزملكاوية مش بقوا زملكاوية مرة واحدة كدة ولكن فيه تفصيل ليهم.
خلينا نقول حاجة بس فى الاول كدة وهيه ان جيل السبعينيات( جيل طه بصرى, وحسن شحاته, وابراهيم يوسف, وفاروق جعفر والناس دى) بتاع الزمالك هوه اللى عمل جمهور الزمالك اللى عايش دلوقتى وطبعا أولادهم كملو من بعدهم. فى 3 أنواع للزملكاوية,
النواع الاول : زملكاوي بالوراثة
ودة أغلب نوع من الانواع ال3, زملكاوى بالوراثة يعنى الواد من دول اتولد لقى أبوه زملكاوى متعصب وكل مايشوفه يقوله شجع الزمالك شجع الزمالك طبعا أكيد الواد لسة صغير ومش عارف حاجة وتلاقى الاب من دول علشان يضحك على ابنه يفهمه ان الزمالك بيلبس أحمر علشان لما يتفرج على ماتش أهلى وزمالك يلاقى الفرقة اللى لابسة أحمر هيه اللى بتجييب أجوان, طبعا لما الواد يكبر ويكبر الزمالك هيدخل فى عقله بس ساعتها طبعا الزملكاوى الابن بيفهم ان الزمالك بيلبس أبيض والاهلى بيلبس أحمر, بس برضو الزملكاوى الاب صايع, بيخلى ابنه يتفرج على الماتشات اللى الزمالك ضامن فيها المكسب علشان يحس بطعم الفوز قبل ما يكبر كمان وكمان ويفهم الحقيقة المرة. النوع دة من الزملكاوية بيبقى رافض من جواه انه يبقى زملكاوى بس أبوه عامل قهر عليه وبيقوله الزمالك مدرسة لعب وفن وهندسة. الزملكاوى الابن لما بيكبر ويبقى فى سن المراهقة بيتحول بس مش بيتحول ويبقى أهلاوى لان دى تعتبر عيبة فى حقه ولكن بيبعد عن الكورة أساسا ولما حد ييجى يسأله انت اهلاوى ولا زملكاوى هتلاقيه يقولك " انا مليش فى الكورة اساساً " ومش بشجع حد, أول ما تلاقى حد قالك كدة يبقى دة 99% زملكاوى وزهق من اللى بيحصل فيه فبعد عن الكورة أساساً
النوع التانى من الزملكاوية: زملكاوى خلف خلاف
ودول نسبة قليلة أوى أوى من الزملكاوية ويعنى ان الولد بيبقى اساساً بيحب يلفت نظر اللى حواليه ومش عارف يعمل اية, فبيقول انه زملكاوى ( أراهن على 100 جنيه ان فى اللحظة دى كل اللى بيسمعوه هيبصولو جامد أوى ) وبكدة هيكون لفت النظر زى ماهوه عايز, والناس بتربط الزمالك بيه وهوه بيتربك بالزمالك وبيبقى زملكاوى عادى
النوع التالت من الزملكاوية : زملكاوى بالصدفة - تعاطفاً
بالصدفة يعنى الزملكاوى من دول بيبقى ملوش فى الكورة أساساً وحتى أبوه مش بيحب الكورة (على أساس انه كان زملكاوى بالوراثة بس فكس نفسه ). انا هضرب مثل صغير بس هتفهموا منه المعنى, مش لو فى ناس بتلعب كورة وانت جاى زيادة عليهم ولقيتهم بيلعبوا ولما بتطلب انك تنزل بيقلولك اية؟ أكيد بيقولوا انزل مع الفرقة الخسارة (العقل بيقول كدة - واى حد بيلعب كورة على طول عارف كدة) انا اعتقد كدة الفكرة وصلت يعنى الولد اللى لسة مش عارف حاجة بتلاقيه بيتعاطف مع الفرقة اللى كل شوية بتخسر وكل شوية تتغلب, بس النوع دة مش موجود اوى وكمان النوع دة لما بيكبر بيبقى أهلاوى على طول علشان بيكره نفسه بعد كدة وبيكره اليوم اللى فكر فيه يبقى زملكاوى مش علشان الزمالك وحش, بس علشان هوه كان نفسة يبقى أهلاوى أصيل زى كل البنى أدميين اللى عايشيين فى مصر وأفريقيا. وزى ما قلت قبل كدة النوع دة قليل اوى اوى ولو عملنا نسبة بين ال3 أنواع هنلاقى ان: النواع الاول (بالوراثة) حوالى 98% - النوع التانى (خلف خلاف) حوالى 0.50% - النوع التالت (بالصدفة - تعاطفاً) حوالى 1.50%

وبكدة نكون خلصنا أنواع الزملكاوية وهندخل على حبة حقائق علمية ومثبته عند اى حد بيفهم فى الكورة

حقائق علميــــــــــــــــــة
الحقيقة الاولى: 92% من اللى بيروحوا للعيادات النفسية زملكاوية - ودة بسبب اللى عامله الكابتن المحترم وسيادة المستشار المبجل مرتضى منصور ومش كدة وبس دة كمان بسبب النتايج اللى بيعملها الفريق فى كل البطولات وفى كل الازمنة (هتكلم على حكاية الازمنة دى معدين علشان عارف انتوا هتقولوا ان الزمالك حبة فوق وحبة تحت)

الحقيقة التانية: هيتبقى 8% ودول بينقسموا الى 7% من اتباع الدروايش ودة مش بسبب النتايج او ان الفريق مش بياخد بطولة لانهم متعودين على كدة ولكن بسبب الادارة اللى بتوديهم فى داهية كل مرة, الواحد فى المية التانى دة اهلاوية ودة مش بسبب النتايج طبعا الحمد لله وأكيد مش بسبب الادارة علشان الحمد لله برضو الاهلى فيه احسن ادارة فى مصر ولكن بسبب ماتش النجم الساحلى فى نهائى دورى الابطال الافريقى

الحقيقة التالتة: الزمالك والزملكاوية فاكرين نفسهم قد الاهلى ودة علشان همه اقرب المنافسين محصلش حتى منافس ودة بسبب ان ادارة الزمالك كل شوية بتعمل دماغها بدماغ الاهلى وطبعا الزملكاوية مابيصدقوا, وبرضو انا مشفق عليهم فى الحتة دى علشان الاعلام مهيأ للناس ان الزمالك قوة مع الاهلى ودة غلط بدليل ان الاهلى كسبان الزمالك ضعف عدد المرات اللى الزمالك كسب فيها الاهلى - يبقى ازاى بقى الزمالك قوة مع الاهلى

الحقيقة الرابعة: فى كل دورى فى العالم هنلاقى فرقتين بينافسوا بعض جامد أوى اوى والباقى بينافس بعضه برضو جامد أوى اوى, يعنى مثلا لو شفنا الكالشيو هنلاقى ميلان واخد الدورى 14 مرة والانتر واخد الدورى 15 مرة يعنى لو ميلان خد الدورى مرة واحدة بس هيبقى قد الانتر وطبعا الانتر هيحاول يبعد وبكدة يبقى فعلا لما ميلان يلاعب الانتر هنقول بجد ديربى ( أكيد انا مش غلطان فى اللى بقوله ), لو نشوف كدة البريميرليج هنلاقى ان ارسنال 13دورى ومان يونايتد 15 دورى يعنى نفس الكلام بتاع الكالشيو

الحقيقة الخامسة: كل الزملكاوية بيقولوا ان اى فريق مرة بيبقى فوق ومرة بيبقى تحت, ودة طبعا فى كل حاجة ماعدا الزمالك, الزمالك ديماً تحت. بدليل ان لما الاهلى تعبان مواسم 2000-2001 و 2001-2002 و 2002-2003 و2003-2004 الزمالك مخدش الدورى غير 2001-2002 و 2002-2003 و2003-2004 يعنى 3مرات بس والاسماعيلى خد الدورى موسم 2000-2001 الدورى دة بتاع ال6-1 بس برضو الاهلى مطلعش من مولد بلا حمص زى ما الزمالك عمل ال4سنين اللى فاتو. الاهلى خد 2001 دورى الابطال الافريقى, الاهلى خد 2002 السوبر الافريقى وكاس مصر والسوبر المحلى من الزمالك, و2003 السنة الوحيدة اللى الاهلى مخدش فيها بطولة بس برضو كنا مبسوطين وأكيد مش هتكلم عن مواسم 2004-2005 و2005-2006 و2006-2007 و2007-2008

بكدة خلصت الحقايق وهندخل على الحلول اللى انا شايفها

الحلـــــــــــــــــــــــــول
أولاً: انهم يهدوا نادى الزمالك دة من الاساس وكل شئ يرجع زى ماكان وكل حاجة تبقى حلوة ومش هنحتاج حاجة تانية
ثانياً: فى حل بس صعب شوية ان الزمالك يكسب الاهلى حوالى 22 سنة ورا بعض ودة طبعا مش هيحصل لو ابو الهول نطق

انا كدة خلصت الجزء الاول بتاع انواع الزملكاوية معلش انا عارف طولت عليكوا اوى اوى اوى
بس كان لازم الكلام دة يتقال
استنوا الجزء التانى بتاع 60 سنة الاهلى بيكسب الزمالك من سنه 1948 لحد 2008

ياريت مفيش زملكاوى يزعل علشان دى الحقيقة

الكلام دى بيعبر عن نفسيه مريضه متحيزع ومتعصبه لابعد درجه
الرياضه مش كده
ولا الروح الرياضيه كده
كل واحد حر فى اختيار انتمائه والنادى البيشجعه
ومش من حق حد يفرض على حد انتمائاته الشخصيه
وبقوله ربنا يشفيك ودى مش اهانه
لان العنده دى مرض

فعلا الجهل نور - أولا ابراهيم يوسف من جيل الثمانينيات وليس السبعينيات عشان بس نثبت جهله وبعدين زمالك الستينيات كان أفضل من جيل السبعينات وأذاق الاهلى الهزائم وحصد الدوري عامين متتاليين وكان الاهلي وقتها ينافس على المركز الثامن
عموما دا شخص خارج من مصحه نفسيه فليس عليه حرج اعذروه يا جماعه وادعوله ربنا يشفيه من مرض الجهلاويه